Jahresbericht 2023

Z Eröffnigsschiesse het i däm Jahr bi schönem Wätter u agnehme Temparature chönne eröffnet wärde. I säuber ha dörfe oder o chli müsse mitz ir Stadt Bärn ar Delegiererteversammlig vom Mittelland teilnäh.

Mir si bi de erschte Schiesse mit Gürbecup, de verschiedene Qualifikatione ziemlech a üsi Gränze gstosse was dr Platz a belangt o im Beizli isches im Afnang immer voll gsy, das isch natürlech nume guet u drumm mache mir das mitem Umbou o chly grösser.

Am Feldschiesse z Riggisberg hei sech dr Horst Anton u Horst Bruno mit je 70 Punkt die erschte Plätz gsicheret u dr Tönu het dr Feldmeischter Teller dörfe entgägä näh.

Bir Mannschaftsmeisterschaft het nur no ei Gruppe mit gmacht das für zwöi eifach nid gnueg Schütze het wo möchte mitmache. U das isch immer so chly nes uf u ab. I däm Jahr eher im Mittelfeld.

Über z Kantonale Schützefest weisi leider säuber nüt z Brichte, bi nid derbi gsy, u drum het mir da d Nadine a Bricht gschribe. Am morge frühe ischme ufen Viehschauplatz z Riggisberg gstartet richtig Brünig Indoor nach dr Waffekonrolle het me probiert sech durch die unterirdische Gänge zrächt z finde. Am morge het me im mittlere Stock Rangeure gha, u da es für vili zerscht mau isch gsy so im künstliche Liecht z schiesse, het das nid ganz eifach gmacht – im Schiesszubehörlade hets wahrschinlech ungwöhnlich vieli Caps mit Klappen brucht. Dank üsem Fähndrich Hänsu hei mir natürlech o immer a üsem Tisch chönne Platz näh. Am Namitag hei mir im obere Stock no a Schibe übercho u das isch doch vo einige ziemlche gschetzt worde da im mittlere Stock witerhin mitem Liecht isch kämpft worde. Die Toleranz mit gnauem Luege isch fasch nid vorhande gsy, somit zu wenig geschaut – ziemlich ungenau getroffen. Nachem Abrächne hei sech einegi schnell ufe Heiwäg gmacht u a chlini Guppe isch zum Nachtässe no im Appaluusa in Spiez i kehrt. So isch das ume as glungnigs Schützefescht gsy wo zum Schluss für à Verein u Gruppe Grüfis no chly Geld usegluegt het.

A däre Stell möchti scho mau ar Nadine merci säge für d Organisation u für a usfüherlech Bricht.

I däm Jahr hei mir o ume üse Vereinscup chönne düre führe u wie i scho a paar Mal gseit ha geit dr Sieg meischtens zu üsne Foue u da bringts o nüt, weme se ir erschte u o ir zwöite Rundi zäme tuet uslose, d Angela het zwar scho lang witers wöue aber si hets bis zum Schluss düre zoge u dä Final gäge Fabian Bähler gwunne. Uf Platz 3 u 4 si Horst Beat u Grünig Werner 42.

Mir si a gfragt worde z Veteraneschiesse düre z führe, gefragt, getan, leider hei das nid so vieu Schütze ir Rüti gfunde, aber as isch vo üsne Veterane u dr Lisa super Organisiert worde u o d Feschtwirtschaft im Pavillon isch für das bruchbar gsy. Aus i auem a glungene Alass, as grosses Merci aune wo da mitgoufe hei.

D Jahresmeisterschaft wie ou der Final het ganz suverän d Angela Horst für sich entschiede, da mir as neus Punkereglement hei, hetsech da dr Tönu u ou die wytere Schütze schwär da mitshaute.

Mir dörfe o i däm jahr wie scho id letschte ume stolz sy uf üsi Jungschütze. Am Gürbe Wettschiesse hei die 5 Jungschütze / Jungschützinne zu 100 % abgliferet u dr Kranz mit hei gno, sy hei dr 3, 4, 5, 7 u 21 Rang beleit. Ar Angela hets im MSSV mit 368 Punkt zum 6. Rang glängt. I möchte de Jungschütze zu dene guete Resultat gratuliere u am Jungschützeleiter Gerber Ädu herzlech danke für sini Arbeit. Merci vieumau.

Somit chumi zum Schluss, wie immer bedanki mi bi mine Vorstandskollege, Schütze, üsere Wirtin Lisa Reichenbach für au die gleischteti Arbeit ohni Euch geits nid. I wünsche aune guet Schuss für d` Saison 2024 u bibet gsund.

Füre Jahresbricht

Therese Wittwer