Jahresbericht 2022

Dr Jahrsbricht 2022 faut mir nid so liecht wie o scho, da i zum beginn vor Saison nacheme Schlagafau no ir Reha im Spitau bi gsy u nid so vieu vom Schiessbetrieb ha mit übercho. Kurz vorhär ha i ja no dä Chuchiumbou id Wäg gleiet u das het du Michu Bähler id Hand gno. As het meh z`tüe gä aus me het erwaret u Michu het mit sine Häufer aues gä. D`Ziel bis am Eröffnigsschiesse fertig z`si het nid ganz glängt u somit isch a däm Namittag no tatkräftig bout worde u nid jede het am Schiesse chöne teil näh. Gwunne im Nachschiesse het mit 40 Punkt d Angela Horst si isch jedoch nid Prisberächtig gsy. D Prise si gange a Käser Stefan, Bähler Fabian, Portner Alex, Bähler Michael u Pulfer Philip.

Z Feldschiesse het wie üblech ume z Riggisberg statt gfunde. Da het mit 68 Punkt Schweier Hans-Jürg gwunne u dr Feldmeister Teller übercho. Gfolgt vo Horst Anton u Nadia von Niederhäuser äbefalls mit 68 Punkt.

Bir Mannschaftsmeiterschaft het nur die zwöiti Guppe chöne a Rundi gwinne aus andere isch verlore gange, somit si mir wiederum abgtiege. Da es sehr mühesam isch au monet ider zwöite Mannschaft zweh Schütze z finde wo no die Standblätter fülle u ig nüme jedes mal möchte bitti bätti mache ha ig entschlosse die Guppe für z Jahr 2023 abzmäude, äs tut mir leid für die sächs Schütze / Schützinne wo da immer no mitgmacht hei, aber i ha niemer gfunde wo da möcht regelmässig mit mache.

Über ds Urner Kantonale Schützenfest cha i nid vieu säge, da ig nid ha teilgno wüu das für mi no z vieu wär gsy, äs isch aber wie immer super vor Nadine Bähler orgnisiert gsy u die wo si dreby gsy hei sicher spass gha.

Z Oberländische Schützenfest hei mir z`Blumistei bsucht u zum Glück hets da o a Grosslinwand gha, somit hei mir chöne z`Eidgenössische Schwingfest mitverfolge. Leider si mir üs nid so gwohnt ohni Bländine z schiesse u sehr spät gmerkt, dass mere chönnt abela, aber o das het nid bi aune ghoufe. Da i nüt speziells ha mit übercho, dänki, dasses de Schütze passt het.

Üse Verenscup het i däm Jahr am 150 jährige Jubiläumsschiesse müsse Platz mache. Dä Stich het d`Ramona Guggisberg mit 95 Punkt vorem Horst Anton und em Käser Stefan gwunne. Z` OK unter der Leitig vor Martina Zbinden het da für am 19. + 20. August 2022 as tolls Schützenfest organisiert. Mit zwoi – drüü Usnahme ha ig nume gueti Rückmäldige übercho, o die rassegi Musig vom Samschitg Abe het gloub aune passt. Da möchti doch aune Schütze, Häufer wärend em Fesch u vorauem am OK bestens Danke für die gleischteti Arbeit dir heit das super gmacht. Äs isch super gsy. Merci vieumau.

D Jahresmeisterschaft wie ou der Final het Horst Bruno für sich entschiede, wyter Finalischte Horst Anton, Käser Martin, Bähler Fabian, Bähler Michael u Käser Stefan.

Mir dörfe o i däm jahr ume stolz sy uf üsi Jungschütze. Am Gürbe Wettschiesse hei mir grad zwöi Gwinnerinne mit 95 Punkt het d Angela bi de Jungschütze gwunne u mit 75 Punke d Ade bi de Jugendliche. Härzlechi Gratulation. Am Mittelländische z Schwarzenburg hetsech d Angela mit 132 Punkt füre Kantonalfinal chönne qualifiziere u dert isches du nid so gloffe wie o scho. Jedoch isch si mit 379 Punkt die beschti Jungschützin von Gürbetal. I möchte de Jungschütze zu dene guete Resultat gratuliere u am Jungschützeleiter Gerber Ädu herzlech danke für sini arbeit. Merci vieumau.

I däm Jahr het o wieder z Wyberschiesse statt gfunde ha igs doch gschaft näbere Guppe Froue no mitere Jungschütze Gruppe teil z näh, leider isch d Ramona chrank worde u da ha ig bi de Froue nid chönne a kompletti Guppe stelle – z Intresse vo üsne Froue isch nid gross gsy da teil z näh, u da ha ig bir Nadja von Niederhüser vo Riggisberg um Unterstützig gfragt, das het mit doch sehr möge, villicht passt es de ja i drüne Jahr ume besser.

Da ig nid so vieu bi im Schützehus gsy, ha ig vo de Veterane nüt mit über cho, villicht cha ja im Aschluss Bühlmann Aschi no öppis säge.

Id de Summer Ferie hei mir ja no z`Dach vom Schützehus ernöieret u da möchti mi no bi Bühlmann Hans, Bühlmann Aschi u Aeschbacher Hans bedanke, dass si da am Rohrbach Ädu ghoufe hei. Merci vieuma.

Somit chumi zum Schluss, wie immer bedanki mi bi mine Vorstandskollege, Schütze, üsere Wirtin Lisa Reichenbach für au die gleischteti Arbeit ohni Euch geits nid. I wünsche aune guet Schuss für d` Saison 2023 u bibet gsund.

Füre Jahresbricht

Therese Wittwer