Jahresbericht 2021

Wie scho im letschte Jahr, hei mir nid gwüsst ob mir i däm Jahr pünktlech chöi id Saison starte. Under erschwerte Bedingige hei mir am 20. März 2021 mit em Eröffnigschiesse gstartet – mann so chaut isches scho lang nüme gsy u ufwärme hei mir üs o nid chöne da mer z Beizli nid hei dörfe ufmache. Da hets Chappe und Hänsche brucht, dämendspächend si o d` Resultat us gfaue den meh aus 38 Punkt hets a däm Namitag nid gä.

Die erschte Monät si immer voll mit Gürbe Cup, MMMS, Regional Rundi Qualifikatione, interni Meisterschaft usw. u das aus daheime schiesse, bi somene Schutzkonzept hei mir schnell mau müesse feststelle dass die einte u andere fasch nid hei düre möge mit de Programm u das uswärts hei nache gholt.  

I däm Jahr hei mir vieli Höhepünkt dörfe fyre, a gfange het das mit em Feldschiesse z Riggisberg, da het d` Martina Zbinden am Frytig Abe mit em Resultat vo 70 Punkt vorgleit u das isch vo keim meh übertroffe worde, nume Stähli Thömu hetsech uf em zwöite Rang plaziert u somit as kompletts Rüti Podescht verhinderet gfolgt vo Gilgen Jürg u Guggisberg Ramona mit je 68 Punkt.

Dr Vereinscup liegt ja eher bi üsne Froue, leider hei mir das o das Jahr nid ganz gschafft – d`Ramona het eigentlich nume die erschti Rundi wöue Schiesse u nähr wieder hei zu ihrne liebschte ga, da isch aber nüt drus worde, si isch ersch im Finau vo Gerber Adrian gschlage worde – somit probiere mirs im nächschte Jahr wieder.

Für d` Gruppenmeisterschaft hei sich d`Grüfis u d` Näbuchrieger qualifiziert leider si si scho frühe i de Hauptrundine usgschiede. Jedoch am Kantonalfinal in Thun hei sich d`Grüfis bis itz Finale füre kämpft u dert dr 17. Rang beleit – sowit isch i de letschte Jahr ke Gruppe cho. Am Gürbe Cup Final z` Riggisberg hei si du richtig zuegschlage  u mit 703 Punkt hinter Belp Enzian dr zwöit Platz beleit.

Scho bald einisch isch klar gsy, dass z`Eidgenössische Schützenfescht nid wird wie normal statt finde. Äs isch i de eigetä Ständ gschosse worde. Auso mache mir da z`Beschte druss. Wo mi d` Nadin Bähler churz vorhär a gsproche het, si möchti Luzern zu üs hole u chly dekoriere, am Abe no a Bar mache, bi ig zersch  s`keptisch gsy– chunnt das überhaupt a u wirds geschetzt – nid desto trotz hei mir am Fritig morge a gfange Putze uz dekoriere mit Ballön blau – wyss natürlech. O dr Fehrseh im Beitzli het nid dörfe fähle, damit d`Resultat hei chöne mitverfolgt wärde. Äs het vieu z vorbereite gä.  Am Samschitg morge hets mit Spiegelei a gfange, wär het Luscht gha. Mir hei a tolle Tag mit Schiesse, Brätlen u am Abe mitere Bar das Eidgenössische zu üsem Fescht gmacht. Obs für alli so gstimmt het, cha ig nid beurteile, mir hets jedefaus gfalle, obschon i gmerkt ha, dass ig nüme jung bi u für Späss wie d` Nacht düre z`mache – z alt bi. Für d` Nadin isches no nid ganz z änd gsy, het sie doch die 2163 Schuss einzeln no dörfe uf das Portal igä – äs ganz grosses merci vieumau Nadine. Damit ig niemer vergisse, a aui wo hei ghoffe dä Tag z Orgnisiere as häzlechs Dankeschön.

Ds Absende het afangs Oktober in Luzern statt gfunde. Mir si scho früe vo de Schütze Riggisberg a gfragt worde, ob mir zäme möchte ga u somit a Car teile. Warum nid, somit sy mir am 16. Oktober nach Luzern gange – mir hei grosses Glück gha, den a Wuche vorhär isch me bis zu vier Stund a gstande, mir sy düre gloffe u scho nach kurzer Zyt bim erschte Bier ghöcklet. Dr Vergnügispark näbe dranne, hei mir ev. Chly spät endekt, den am haubi vieri hei mir üs ume ufe heiwäg gmacht. Mit eme Nachtässe im Restaurant Adler hei mir das Eidgenössische abgschlosse.

D Jahresmeisterschaft het i däm Jahr dr Simon Reichenbach chönne für sich endscheide u somit d Siegesserie vom Manuel Horst chönne bräche.

I bi no nid ganz am Schluss, denn jetzt chunnt no z beschte vo auem, üsi Jungschütze vorauem zwöi hei guet mit gmacht u si fasch jedes Mau bim Üebe derbi gsy – hei o am Eidgenössische u Vereins Cup teil gno u dörfe zfriede sy mit de Resultat. Am Jubiläumsschiesse z Wattenwil het d Angela Horst mit 93 Punkt z höchste Jungschütze Resultat gmacht. Ja wie geit das wyter z Riggisberg het sie sich füre Kantonalfinal z Aarberg qualifiziert. Am Donnschtig vorem Final het sie no müesse üebe wie dasme tuet schiebe da dr Ädu ihre nid het dörfe häufe. I ha a däm Abe ja scho as guets Buchgfüehl gha, ha Ädu gftagt was mer mache wesi gwinnt – sini Antwort isch gsy, zersch muessi de schiesse. Ok wartemer mau ab. Am Samschtig am zwänzg ab drüü ha i d Nachricht übercho dases guet us gseht füre 1. Platz z`mache – ja de müssemer äuä chli gas gä fürne Empfang. Ädu isch telefonisch eifach nid erreichbar gsy, wie ha i das Watsup i däm momänt verfluecht, ersch wo ig im gschribe ha lüt mir a isch das telefon sofort gange. Leider isch zu däm Zytpunkt no nid klar gsy obs längt da no eis Führ het müesse schiesse, guet mir mache glych öppis. As isch lang gange ersch a stund später ha ig d mäudig übercho u da isch d Rangverkündigung o scho düre gsy, jetzt hets gheisse organisiere. Für so ne spontane Empfang bruchts spontani Vereinsmitgieder u die ha ig o sofort gfunde – Tönu u d`Regula wo si ga i choufe, Küsu dr Fotograf, Bühlmann Hans mit dr Fahne, d Lisa wo isch itz Beizli cho häufe, d Ramona u Alex wo no as Lindtuech gspeyet hei u d Nadine wo d Nachricht a aui Vereinsmitgieder grschribe het. Aui dene möchti Danke für ihri spontanität u dr mithilf damit mir ar Angela hei dä Empfang chönne ermügleche, mir hei sie komplett chönne überrasche da sie nüt het mitübercho u d Nachricht i üsem Chat nid gläse het – chly komisch hetse ja scho afe düecht, dass Ädu vo Aarberg über Thun u Wattenwil isch ga chere u zum Schluss no id Wislisau isch ga tanke wenn dr Tank no haub voll isch. Mit 140 Punkt het si dä Final vorem Staudenmann Janick vo Guggisberg ebefalls 140 Punkt und am Roggli Matthias vo Lanzehüsere mit 139 Punkt chönne gwinne u wenn dir das Standblatt a lueget de faut euch uf si isch würklech a Schnellfüür Spezialistin scho z Wattenwil het si das so chönne mache 3 x 10(alles Musche) u 2 x 9 – die zwöi nüni heise me gergert aus die zwöi achti wosi a gschosse het u da cha i de nume dr Chopf schüttle. De chumi zume Zytpunkt wo ig u sicher aui üsi Mitglider üsem Jungschütze Leiter Ädu u sine Häufer möchti danke für au die Büetz u Ufwänd wo da betriebe wärde – das isch öie Verdienscht.

As würdi bestimmt no meh gä, ha vilicht z einte u andere Vergässe z erwähne aber i möchti da abschliesse

 i wünsche euch für z` Jahr 2022 alles Gute, blibet gsund u wenns de losgeit mit Schiesse aune Guet Schuss.

Eure Vizepräsidentin
Therese Wittwer