Jahresbericht 2019

Anfangs Januar u langsam aber sicher wird es Zyt mir Gedanke ume Jahresbricht z mache. Leider geit das nid immer uf Chnopfdruck bi am schribe u lösche u neu ume am schribe. Ghoue oder Gtoche hüt abe muess dä fertig si, egau wie dasser use chunnt. Villicht muesi mau d Ranglischte zur Hand näh de chunnt mer de villicht o dr Afang vom Jahresbricht i Sinn, bim düre luege faut mir uf dass am Eröffnigsschiesse niemer vo üs het chöne z maximum vo 40 Punkt mache, mit 39 Punkt hei agfange dr Grünig Werner 42, Horst Bruno u dr Gerber Adrian.

Wie ig die letsche Jahr immer wieder gseit ha, wärs toll weme am Feldschiesse wieder mau vor Rüti chönnte dr gwinner stelle u dr erscht Platz nid müesst miteme Riggisberger teile. Das isch üs ziemlech guet glunge die erschte vier Plätz ghöre üs u i de erschte zäh Räng si de grad mau siebe vor Rüti u nume drei vo Riggisberg. Är het i de letschte zwöi – drü jahr mit dr Gsundheit z kämpfe gha u drum isches umso schöner het dr Käser Tinu das Feldschiesse 2019 mit 69 Punkt chöne gwinne u somit o der Feldmeischter Teller übercho.

Bi der Mannschaftsmeischterschaft hei beidi Gruppe kei einzegi Rundi chöne gwinne. Meh möchti da derzue nid säge.

Dr Vereinscup hei mir froue i däm Jahr wieder mau müsse us de Händ gäh, i ha leider dr Final gäge Reichenbach Simu verlore.

37, 84, 70, 69, 95, 91, 70, u 55 das sy nid öppe Mass vo Froue, Weme i üsere Jahresmeischterschaft die Resultat cha mache git das o sehr viel Plus Punkt, somit het dr Horst Mänu d Jahreskonkuränz mit 12 Pluspunkt Vorschprung ufe Horst Brünu überläge chöne gwinne o dr Jahresfinal het är für sich entschiede.

D Veterane hei am Eidgenöissiche z Züri teilgno, hei mir doch üse langjährig Kassier dr Kürtu vergesse aus Veteran z mälde, mitere Express a mäudig het o är chöne teilnäh. Wie i us diskusione ha mitüber cho isch das a glungene Alass gsy. Da üsi Verterane o chly gsellegi sy isch ine dr Car chly früech üme zurügg gfahre hei fasch o chli müsse jufle. Si wäre sicher no gärn chli lenger blibe.

Bi de Jungschütze chöi mir mau nid der bescht im Gürbeschiesssportverband stelle das het leider mau nid glängt. Aber bim Wettschiesse het dr mühlemann diemo mit 91 Punkt gwunne. Am Wettschiesse vom Mittelland heimer mit 142 Punkt dr Portner Marco ufem 1. Rang u mit 136 Punkt dr Mühlemann Diemo ufem 3. Rang. D Bärner Gruppemeischterschaft vo de Jungschütze wo i drei Rundene gschosse wird hei üsi mit   1011 Punkt überläge gwunne.

Mir hei i däm Jahr z Kantonale Schützefescht im Appenzell bsuecht. Üses Ziel wär gsy am Fritig Namittag u Samschtig Morge z schiesse, aber leider hei d Nadin u ig das Amäude Portal nid so im Griff ga. Hei eifach kener Schiebe am Samschti chönne mäude – somit het das gheisse aus am Fritig Namittag schiesse. Das isch nid grad bi aune guet a cho sy doch a paar chly i Stess cho, da si zu vieune Stiche o no d Meischerschaft hei müsse üsela. Fertig worde si bis am Abe aber aui.

Üsi Unterkunft isch chly absits gsy u im Restaurant wo mir z Nachtässe reserviert hei gha het me üs ersch für am Samschti Abe erwartet, glychwou hei mir doch öppis z Nacht übercho.   Dr Wirt het sogar no füre Geischt vo Tönu deckt ga u o dä het plötzlech so öppis wie a Büchsefras vorsech gha. Ja i gloube das dr eint u anger doch a chly vieu appizäller het gha. Für üsi Verhäutniss si die meischte o früh scho ga schlafe. Die vier wo d Nacht düre gmacht hei si doch ono rächzitig zrügg cho, für dasmer hei chönne üses Programm vom Samschtig i agriff nä. Nachem Abrächne im Zentum si mir no ga luege wie dä Appenzeller härgstellt wird. Weme de scho mau dert isch. Dass dr Simu nid grad ume hingerzi usem Rum isch gange, gränzt ja anes Wunder denn vo andere Gsellschafte het me ghört, dass das nid jede het möge verlide. Mi sött ja nid meh aus eis bis zwöi appenzeller näh, süsch sigme überchrütert, wo i das ghört ha, ha i müesse säge, dass am Fritig Abe a paar würklech chli si überchrütert gsy nid wahr Tönu?  Nachem Rundgang hetme am Schluss natürlech o no dörfe degustiere. Mir hei du gägä abe d heikehr ufis gno u hie im Adler wie scho i de letschte Jahr miteme Nachtässe das Kantonale Schützefescht Appenzell abgschlosse.

Im Septämber hei mer o am Emmitalische no teilgno, wo mir z Datum hei festgleit u erwähnt, dass de denn o dr Final vom Gürbe Cup z Riggisberg stattfindet hets gheisse dert muesme zersch häre cho u süsch geit de das scho. Und siehe da hei doch a paar müsse pressiere u bis am Mittag fertig si, damit si rächtzigi hei am Final chönne teilnäh. Leider si beidi Gruppe im Halbfinal usgschiede d Gruppe Wildsau im 4. Rang mit 700 Punkt u d Gruppe Näbuchrieger im 6. Rang mit 677 Punkt. Wie immer hei mir o das Emmitalische miteme Nachtässe hie im Adler abgschlosse.

Im Auguscht hei mir die neui Elektronik vo de Sius montiert – o wenn das bim i stelle vo de Stiche sicher a erliechterig isch, gits de nid o outomatisch gueti Resultat, die müsse de immer no säuber gschosse wärde. Somit ha ig i däm jahr doch no a Jahrsbricht stand bracht wenn o mau chly anders. Möcht no ar Nadine danke für d Organisation vo de Schützefescht. Aune wo ghoufe hei bir Installierig vor neue Alag, bi mine Vorstandskollege u o dene wo süsch Jahr i u us immer wieder häufe üse Betrieb i Schach z haute. Nid z letscht o üsere Wirtin ar Lisa Reichenbach.

I däm sinn merci vieumau für zue z lose, für z Jahr 2020 wünschi Euch Gueti Gsundheit u vorauem aune guet Schuss. Füre Jahresbricht 2019

Eui Vizepräsitentin
Therese Wittwer