Jahresbericht 2018

So schwär cha ja das nid sy am Eröffnigschiesse as guets Resultat z`mache – hetme ömu z` Gfüehl. Weme aber bim vierte Schuss as eis macht, de fasch de scho afa rächnä damit me no chönnt mit grün im Jahresprogamm afa. Dr Bähler Fabian het das Problem nid gha, aus einzige het är mit em Punkte Maximum chönne i die Saison starte.

Wo mi d Näbuchrieger gfragt hei, obi chönnt mit cho a d`Landesteilrundi i Riedbach da si öpper zweni heige, ha i nume gseit, sicher müesster nid my frage, ir erschte Rundi ha i grad nume 121 Punkt gmacht u sowiso a schlächte Start gha. Ja nu probieremers haut. Ha am Donnschtig vorhär no z` Gfühl gha müesst doch das Programm no eis üebe u was passiert da? I ha chönne mache wasi ha wöue äs het nume zähner gäh, nachem sächste Schuss ha i gseit das zeut de uf z Jahresprogramm – chöit ja dänke da het Horst Tönu natürlech öppis dergägä gha. I ha probiert abzha aber nüt Schlussresultat 148 Punkt u das bim üebe amene gwönleche Donnschtig Abe. Dir chöitnech ja vorstelle das isch wie nes Lufführ dür d`Gruppe Näbuchrieger u sy hei mi natürech gärn mit gno. Zum Glück ha ig im Riedbach chönne für my zwöi aständegi Resultat mache. Leider isch nach der erschte Hauptrundi vor Rüti o niemer meh derby gsy. Wie o am Gürbe Cup Final z Riggisberg dä het ohni a Gruppe vor Rüti statt gfunde. Das söttsech de um chly ändere i däm Jahr.

O am Feldschiesse möchte mir wieder mau der erscht Platz mache, i de letschte Jahr isches meischtens nid am Resutat sondern am Auter gschiteret. Dr Bäher Michael isch mit 67 Punkt Feldmeischter worde.

Was macht as Jahr Pouse, u as Hus boue doch so us, anfangs September het dr Michu no zwöi Programm für d Jahresmeischerschaft müesse schiesse.I ha fasch keh Zyt, las dänk de öppe sy, chunt sini Antwort – aber mit zwöi guete Resultat heter d`Chance ufe erscht Platz füre z cho. O isch das lang gange bis är am Usschiesset het die Sektion gschosse – churz vorem Final heterse doch no use gla, leider hets im du nid ganz glängt ufe erschte Platz, Punkt glych mit Horst Manuel aber dr Manuel het im Obligatorisch meh gmacht. Somit heiss dr Jahresmeischter 2018 mit 51 Pluspunkt Horst Manuel.

Im Jahresfinal vo de beschte sächs het du dr Michu glück gha mit glich viel Punkt wie dr Horst Bruno aber miteme höchere Tiefschuss het är dr Finau gwunne.

Die erschti Mannschaft het aui Rundine chönne gwinne das heist wieder mau ufstig id 1. Liga. Die zwöiti Mannschaft hetsech chönne dr zwöit Rang sichere u blibt warschinlech ir 3. Liga da weisi no nid meh.

D Jungschütze si i däm Jahr meischtens näbem Podescht Rangiert gsy, aber im Jahresprogramm vom Gürbeschiesssportverband hei mir mitem Horst Fabian wiederum dr höchscht gha. Är überchunnt mit 359 Punkt dr Holztäller – für a Zinntäller u  Zinnbächer heter grad chli zweni Punkt gmacht.

Im Vorfeld isch ja gmunklet worde dass es wird schwirig wärde am Bündner Kantonale teil z näh – das hei o mir erfahre den nachem Online öffne für d Ameldige isch nach 24 Std. scho alles usbuechet gsy. Ja nu de gömer haut nach Zürich o dert hei mir nicht schlächt gschosse u sogar a agnähme Platz im Schatte gfunde.

La usklinge hei mir dä Tag hie im Adler z Riggisberg mit eme Nachtässe

Weme möchte a Chueche bache bruchts verschiedeni Zuetate, das chame vome Schiesse bi üs o fasch meine, äs brucht eine wo ihm chli guet cha zuerede, im richtige mömänt die einti oder anderi Raschte tuet schiebe, a absolut perfeckte Tag wo aus stimmt, jedesmal as Punkt meh oder ömu de dr höcher Tiefschuss – wenn das aus passt u de zäme rüehrsch, heisst das nüt anders aus mi isch dr Gwinner oder Gwinnerin vom Vereinscup. I däm Jahr isch das aus ar Grünig Sandra glunge, härzlechi Gratulation no mau derzue.

Wie scho i de letschte Jahr ha ig immer as Thema usepickt u chly meh verzeut, da si scho d`Jungschütze, d`Horschte oder o üsi Froue dra cho. Wases i däm Jahr wird sy, ha i scho letschte Frühlig gwüsst, die sy immer chly z churz cho.  Das isch aber nid so eifach, da i no nid zu dere Kategorie ghöre, u nume Resultat möchti da o nid abeläse, aber wie mache. I ha das letschte Frühlig mau so näbeby im Schützestübli erwähnt u siehe da, scho überchume i Hiuf. Dr Alex Portner hetsech spontan anerbotte mir vo de Veterane a Bricht z schribe. Gly nach der Saison isch dä usführlech Bricht o bi mir im Briefchaschte i troffe. I möchti dä so abeläse wie ne ha übercho.