Jahresbericht 2017
Es wird nid liechter aui Jahr a Bricht z schribe wome doch o no chli cha lache.
I däm Jahr fah i doch mal mit em Eröffnigschiesse a isch ja o z`erschte wo mir mache. Äs hei grad zweh Schütze mit dem Maximum vo 40 Punkt chönne afa. Dr Hirschi Erich u dr Bieri Markus. Witer mit 39 Punkt hei dr Gilgen Jürg, Horst Manuel, Horst Anton u d` Bähler Nadine z`Holzbrettli übercho.
Am Feldschiesse z Riggisberg het dr Horst Anton dr Feldmeisterteller mit 68 Punkt dörfe entgäge näh. Die höchschte Resultat ufem Platz si mit 69 Punkt durch Kaltenrieder Rolf u Guggisberg Ramona erziehlt worde.
Weni dr Jahresbricht vom Gürbeschiesssportverband düre luege, simer i däm Jahr nid i de vordeschte Räng a z`Träffe. Am Gürbeschiesse hei scho mal nume 8 Schütze teil gno sicher o chli dr Grund dass mir am zwöite Datum am Berner Kantonale Schützefest hei teil gno.
Zum Kantonale cha i säge dass dr eint u ander Schütz vo üs sehr gueti Resultat gschosse het, ob das imene Stich oder im Nachdoppel isch gsy. Sicher a glungene Anlass. Dr Simu Reichenbach het mit 59 Punkt bim Militärstich dr 6. Rang erreicht u ar Rangverkündigung dörfe a schöni Uhr entgäga näh. O mit dr Gsellschaft hei mir as guets Resultat erreicht ir 2. Kategorie mit 92.841 Punkt hets glängt für ä 22. Rang. Da sy mir mitere Glogge belohnt worde. Was me villicht no cha erwähne, dass bim Schiessstand in Louveresse no nie isch a Car vor Ort gsy, das het vieu Photos u z`brichte gä.
Zur disjährige Mannschaft Meischterschaft cha i nume so vieu säge, dass beidi Gruppe mit 0 Punkt ufem letschte Platz si u das heisst wiederum abstig. Jetzt chöi mir de ume zueschla.
Dr Vereinscup isch immer a spannendi Sach gwunne het dä dr Gerber Stefan vorem Kaltenrieder Rolf ufem 3 Platz dr Horst Anton u mit guet zuerede u betreue findemer ufem guete 4 Platz d` Grünig Sandra.
Am Gürbecup Final hei wiederum zwöi Gruppe chönne teilnäh, leider si die beide ir 4. Rundi mit je 482 Punkt usgschiede.
Dr disjährig Jahresmeischter isch nid z`brämse gsy mit 62 Pluspunkt het dr Horst Anton überläge die Meischerschaft gwunne, jedoch im Jahresfinal vom Simon Reichenbach isch gschlage worde.
De chumi no zume Tema wo ig i de letschte Jahr immer ha a Gwinner us üsere Gsellschaft dörfe erwähne. Denn im Jahresbricht vom GSSV sy die de ziemlech guet verträtte u i de vordeschte Räng. D` Jungschütze hei dr Gürbecup ir erschte Rundi mit 623 Punk gwunne. Das isch aber de no nid öppe aus den am Wettschiesse z`Riggisberg hei sy doch grad Platz eis bis drü beleit. Uf em 1.Platz mit 90 Punkt dr Stampfli Simon ufem 2. Platz mit 89 Punkt dr Horst Fabian u ufem 3. Platz mit 88 Punkt dr Grünig Stefan. Leider het am Wettschiesse vom Mittelland nume grad eine teilgno dr Rohrbach Kevin het mit 128 Punkt dr 18. Rang erreicht. De darfme sicher no erwähne, dass sy ar Berner Gruppemeischterschaft mit 975 Punkt o gwunne hei. Vergässe darfi nid, dass o i däm Jahr dr bescht Jungschütz vom GSSV vor Rüti chunnt, mit 359 Punkt het dr Marco Portner ar DV dörfe dr Zinnbächer uts Holztäller entgäga nä. Härzlechi Gratulation dä Jungschütze u witer so. Sicher möchti da derzue o mau de Leiter u Betreuer danke für die Büetz wo si immer wieder ufsech nähme für üsi Jungschütze.
I gloube ha jetzt öppe zwichtigschte verzeut, chunnnt mir süsch grad nümme z`Sinn.
I wünsche Euch aune für d`Saison 2018 guet Schuss!
Vitzepräsidentin
Therese Wittwer
