Jahresbericht 2016
Ha mir das Jahr lang überleit, wo u mit was i söu dr bricht a fah oder was i söu verzelle. Den nacheme haube jahr isches nümme so bresänz, aber i gloube mache das chli anders aus i de vorjahr.
Weni da uf d Ranglischte luege, faut mir uf, dass scho am Eröffnigschiesse under de erschte sächs vier Froue derbi sy, under angerem mit eme Maximum vo 40 Punkt durch mini wenigkeit.
Weni da no chly wyter blettere, ja liebi Manne wär hät dänkt, dass am Feldschiesse 2016 am Fritig Abe das Resultat vor Ramona Guggisberg mit 68 Punkt o no am Samschtig zbeschte wird sy, sicher niemer, denn i de letschte Jahr hets immer meh brucht zum gwinne. Dr mit isch üses Feldmeischter Zinntäller i däm Jahr ad Ramona gange.
Dir merket sicher äs geit i däm Jahr chly um üsi Froue im Verein, das isches aber de öppe no nid gsy.
Dr vereinscup isch immer ou chly mit Los Glück verbunde, aber sicher nid nume, denn wes de druf a chunnt muesch de o as Resultat bringe. U das het scho wie im letschte Jahr, isch bis jetzt o no nie vor cho, d Nadine Bähler gschaft, Si het kämpft bis zum schluss. As hätti fasch dr glych Final chönne gä, aber da het si öppis dr gäga gha, denn dr Bärnu isch im Haubfinal use gheit. Somit isch dr Final zwüsche dr Nadine u am Hanspeter Zahnd fest gstande, ja wär ische de das ömu o, eine wo nid so viel isch cho schiesse u de ersch no mitem 57 er Sturmgwehr. Dir gseht auso mit chly Glück u guete Resultat im richtige Moment chunntme wyt füre. A spannendi Sach bis zum Schluss mit ere glückleche Siegerin.
Am Gürbe Cup Finau heimer o wieder mau chönne mit mache, u das grad mit zwehne Gruppe. Het doch Fäbu am Samschtig morge no müsse Schütze nache springe, zum Glück heter no a gruppe zäme bracht, denn sie hei ja o dr 2. Platz mit 703 Punkt hinter Kehrsatz Lisiberg erreicht. Die zwöiti Gruppe Näbuchrieger si ufem 10. Rang mit 689 Punkt rangschiert u das o ume mit zwene Froue ir Gruppe.
Ja bi no nid fertig, wo i bir Jahresmeischerschaft uf d Ranglischte gstosse bi, was isch mir da uf gfalle? Fasch hätte mir Froue chöne die Meischterschaft abschliesse wie mir se hei a gfange. Leider nid ganz z oberscht aber ufem zwöite Rang findemer da ume d Ramona mit 44 Plus Punkt. Leider isches ire im Finau nid so glüffe, isch dert sächsti worde. Da hei die drei Horschte wieder mau zue gschlage. übrigens het dr Simu Reichenbach d Jahresmeischerschaft mit 50 Plus Punkt gwunne.
Ja Manne äs tuet mer leid, dir chömmet i däm Jahresbricht haut mau chly z churz.
E nei mir hei da doch no d`Jungschütze u da isch dr Gerber Adrian am 3. September 2016 mit 135 Punkt mittelländer Meischer worde, härzlechi gratulation.
Witer zu de Jungschütze findetmese am Gürbe Cup ir Schlussranglischte mit 660 Punkt ufem erschte Platz.
Das a chlyne Rückblick, doch möchti nid vergässe, as paar vo üs hei ja no am Kantonale Schützefescht im Tessin teil gno. Auso was chönnti da verzeue?
Villicht zersch a paar Stichwort.
A agnämi Fahrt mitem Car, Wätter schön u heiss, Unterkunft bekannt, für paar vo üs im zämehang mitere Schuelreis, Resultate besseri u schlechteri. U de zum schluss no as tolls Nachtässe ir Badi vo Lugano. Bis uf d Resultat uz Wätter, heimer das doch wiederum are Frou vo üsem Verein z verdanke. Merci Nadine für die tolli Organisation.
De chumi jetzt zum Schluss, liebi Manne was würdet dir o mache ohni üs Froue. I däm Sinn wünschi euch aune für d Saison 2017 guet Schuss.
Vitzepresidäntin
Therese Wittwer
